Qendrat tona

Qendra për Studime Sociale

Qendra për Hulumtime Shoqërore (QSS) u themelua me synimin për të kontribuar në ndërtimin e një shoqërie të bazuar në drejtësi, barazi dhe mirëqenie. Përtej zhvillimit të mendimit shoqëror, ajo është e përkushtuar në studime dhe hulumtime për krijimin e zgjidhjeve praktike dhe të zbatueshme për sfidat shoqërore të kohës.

Në QSS, veprimtaria jonë frymëzohet nga një vështrim realist dhe një analizë konstruktive e sfidave sociale bashkëkohore, duke formësuar zgjidhje përmes mendimit të thelluar shkencor. Me këtë qasje, veprojmë si urë lidhëse mes studiuesve, vendimmarrësve dhe shoqërisë civile, duke nxitur krijimin e dijes së pavarur që pasuron të kuptuarit tonë mbi botën shoqërore.

QSS organizon seminare, punëtori, konferenca dhe simpoziume që krijojnë hapësira ndërveprimi në mes studiuesve, vendimmarrësve dhe shoqërisë civile; ndërkohë zhvillon hulumtime empirike mbi problemet shoqërore, përgatit raporte e analiza të bazuara në evidencë dhe i publikon gjetjet në revista shkencore e platforma tjera akademike.

Qendra për Psikologji

Qendra për Psikologji në institutin tonë është një strukturë akademike e fokusuar në thellimin e njohurive dhe zhvillimin e aftësive profesionale në fushën e psikologjisë. Qëllimi kryesor i kësaj qendre është të ofrojë mundësi edukimi dhe trajnimi për studentët dhe profesionistët, duke i pajisur ata me njohuri të thella teorike dhe praktike që mund të aplikohen në kontekste të ndryshme të jetës shoqërore dhe profesionale.

Kjo qendër është gjithashtu e angazhuar në përmirësimin e mirëqenies mendore të individëve dhe komunitetit përmes intervenimeve të bazuara në kërkime dhe praktika të verifikuara shkencërisht. Aktivitetet e saj përfshijnë zhvillimin dhe ofrimin e programeve mbështetëse që ndihmojnë në adresimin e sfidave të ndryshme psikologjike dhe sociale.

Edukimi dhe përgatitja e studentëve janë të fokusuara jo vetëm në zhvillimin e aftësive për ofrimin e intervenimeve, por edhe në thellimin e njohurive mbi nevojat e shoqërisë, realizimin e kërkimeve dhe ofrimin e intervenimeve adekuate bazuar në këto nevoja. Kjo qendër kontribuon në krijimin e një shoqërie me mirëqenie psikologjike dhe sociale, duke ofruar zgjidhje të bazuara në kërkime të thelluara dhe praktika efektive.

Qendra për Studime Shqiptare dhe të Diasporës “Samiu”

Qendra për Studime Shqiptare dhe të Diasporës “Samiu” u krijua me qëllim thellimin dhe pasurimin e të kuptuarit tonë mbi historinë, kulturën dhe identitetin shqiptar, përmes reflektimit mbi sfidat e sotme dhe zhvillimet e vazhdueshme shoqërore, si dhe duke i ndërthurur me analizën e migrimit dhe të marrëdhënieve të diasporës shqiptare me atdheun.

Në këtë kuadër, Qendra Samiu organizon konferenca, tryeza debati dhe programe botuese, duke shërbyer si urë lidhëse mes studiuesve, vendimmarrësve dhe komuniteteve shqiptare nepër botë. Përmes studimeve shkencore, projekteve dhe partneriteteve me institucione vendase e ndërkombëtare, ajo ndërton një bazë solide njohurish mbi fenomenet migruese dhe rolin e diasporës në zhvillimin kombëtar. Synimi ynë është të fuqizojmë komunikimin dhe bashkëpunimin, të krijojmë mundësi të reja për shkëmbim njohurish dhe të nxisim përfshirjen aktive të diasporës në zhvillimin e qëndrueshëm të vendeve tona.

Qendra për Studime Rinore

Qendra për Studime Rinore (QSR), e themeluar në kuadër të Institutit Nexus, synon të thellojë dhe pasurojë të kuptuarit tonë mbi rininë, duke shqyrtuar sfidat dhe mundësitë e saj në një botë në ndryshim të shpejtë. E orientuar nga praktikat më të mira ndërkombëtare, QSR ndërthur hulumtimin me programe zhvillimi për t’i kthyer idetë shkencore në veprim me ndikim.

Qendra për Studime Rinore (QSR) mbështetet mbi dy dimensione bazike: edukimin dhe hulumtimin. Në dimensionin e edukimit, QSR ndërton një mjedis zhvillimi të njohurive dhe aftësive për të rinjtë, duke projektuar e realizuar seminare, trajnime, programe të strukturuara, punëtori, mentorim dhe forma të tjera ku përfshihen të rinjtë; ndërsa në dimensionin e hulumtimit zhvillon studime akademike mbi problemet, sfidat dhe mundësitë e të rinjve, organizon panele, konferenca e simpoziume si dhe përgatit e publikon raporte hulumtuese dhe paraqet punime në konferenca e revista shkencore, duke respektuar standardet etike dhe metodologjike të fushës.